ཏཱ་ལའི་བླ་མ་དང་རྒྱ་ནག་གཞུང་གཉིས་སུ་ཞིག་གིས་སྐྱོ་གར་འཁྲབ་བཞིན་ཡོད་དམ། དུམ་བུ་གཉིས་པ།

ཆེད་རྩོམ།
ཅང་ཡུས་ཀྱིས་དྲང་ཐད་ནས་ཏཱ་ལའི་རེ་བ་ལྟར་ལན་མ་བཏབ་མོད། ཡིན་ནའང་དངོས་དོན་ལ་བརྟེན་ནས་ཏཱ་ལའི་རུ་ཚོགས་ལ་དོགས་འདྲི་ཞིག་བྱས་ཡོད་དེ། གནོད་ཐེབས་བསླེབ་ལ་ཉེ་བའི་སྐབས་སུ་ཁ་ཡག་ངོ་དགའི་གཏམ་ཁོ་ནར་ཟད་པའི་ཏཱ་ལའི་རུ་ཚོགས་ཀྱིས་གནོད་ཐེབས་མང་ཚོགས་དང་བོད་རིགས་སྤུན་ཟླ་རྣམས་ཀྱི་ཕྱིར་དུ་ཅི་ཞིག་བསྒྲུབ་སོང་ངམ།

གསལ་བཤད།
ལན་བཏབ་མ་བཏབ་ཀྱི་སྐོར་གོང་དུ་བཤད་ཟིན་ཅིང༌། ཏཱ་ལའི་རུ་ཚོགས་ཀྱིས་གནོད་ཐེབས་མང་ཚོགས་དང་བོད་རིགས་སྤུན་ཟླ་རྣམས་ཀྱི་ཕྱིར་དུ་ཅི་ཞིག་བསྒྲུབ་སོང་ངམ། ཞེས་བཤད་པ་ནི་ངོ་མ་ཧང་སང་དགོས་པ་ཞིག་རེད། སུ་ཞིག་ལ་སྐྱོན་བརྗོད་བྱེད་དགོས་ཀྱང་དང་པོ་དེའི་སྐོར་ཞིབ་འཇུག་བྱེད་དགོས་པ་དེ་གལ་ཆེན་པོ་རེད། ༧གོང་ས་མཆོག་དབུ་བཞུགས་ཐོག་བཙན་བྱོལ་བོད་མི་རྣམས་ཀྱིས་ཉིན་མཚན་དུ་འདས་པོ་རྣམས་ཀྱི་ཆེད་བསྔོ་སྨོན་གནང་བ་དང༌། གསོན་ལུས་རྣམས་ཀྱི་ཆེད་ཞལ་འདེབས་བསྡུས་པའི་གྲངས་འབོར་ཡང་ལོ་རྒྱུས་ནང་བྱུང་མྱོང་མེད་པ་ཞིག་ཡོང་དང་ཡོང་བཞིན་པ་རེད། ད་རེས་བོད་པ་ཚོས་གཏོང་ཕོད་ཆེན་པོས་ཞལ་འདེབས་འབུལ་སྟངས་ལ་མི་རྣམས་ཧང་སང་བཅུག་ཡོད།

དེ་མིན་བཙན་བྱོལ་བ་རྣམས་བོད་ནང་འགྲོ་ནས་རོགས་སྐྱོར་བྱེད་འདོད་ཡོད་ཀྱང་རྒྱ་ནག་གཞུང་གིས་བཀག་བཞིན་ཡོད། ཨ་རི་དང་བལ་ཡུལ་ནས་རང་གི་ནང་མི་སྤུན་མཆེད་ཀྱི་རྗེས་མཇུག་འདས་མཆོད་ཆེད་དུ་བོད་ནང་འགྲོ་སྐྱོད་ཆོག་པའི་ཐོན་མཆན་ལམ་ཡིག་ཞུས་པ་རྒྱ་ནག་གཞུང་ཚབ་ཁང་གིས་ཁས་ལེན་བྱས་མེད། དེས་ན་ཕྱིར་སྡོད་བོད་མི་ཚོས་དེ་ལས་ལྷག་པའི་གནོད་ཐེབས་བོད་རིགས་སྤུན་ཟླ་རྣམས་ཀྱི་ཕྱིར་དུ་ཅི་ཞིག་བསྒྲུབ་ནུས་སམ། སྒྲུབ་པའི་ལམ་ཁ་དེ་སུ་ཞིག་གིས་བཀག་ཡོད་དམ། ཕྲུ་གུ་ཕ་མའི་དུར་འཇུག་བྱེད་པར་མ་བཏང་བ་ཡིན་ན། རྒྱ་རིགས་ཞིག་གི་ངོས་ནས་བཤད་ན་དེ་ནི་ཅི་འདྲའི་ཡ་ང་སྙིང་རྗེ་མེད་པའི་བྱེད་སྟངས་ཞིག་རེད་ཨང༌། རྒྱ་ཡི་རིག་གཞུང་གི་ངོས་ནས་བཤད་ན་མི་ཆོས་ཀྱི་དྲི་མ་ཙམ་ཡང་མེད་པ་དེ། ངས་མ་བཤད་ཀྱང་ཉིད་ཀྱིས་མཁྱེན་གསལ་རེད།

ཆེད་རྩོམ།
ཡང་ཏཱ་ལའི་རུ་ཚོགས་ལ་རྒོལ་ལན་དྲག་པོ་ཞིག་སྤྲད་ཡོད་དེ། མཐུན་སྒྲིལ་བརྟན་བརླིང་གི་མེས་རྒྱལ་ནི་ད་གཟོད་བོད་རིགས་སྤུན་ཟླ་བདེ་ཞིང་སྐྱིད་པའི་འགན་ལེན་ནུས་ལྡན་ཞིག་ཡིན། ཡུལ་ཤུལ་ས་ཁུལ་དུ་རང་བྱུང་གནོད་འཚེ་ཆེན་པོ་ཐེབས་པའི་སྐབས་སུ། རྒྱལ་ཡོངས་མི་དམངས་ཀྱིས་མི་རིགས་ཀྱི་དབྱེ་བ་མི་དགར་བར་ནུས་ཤུགས་ཡོད་རྒུ་བཏོན་ནས་ཡུལ་དེའི་བོད་རིགས་སྤུན་ཟླ་རྣམས་ལ་རྒྱབ་རོགས་གནང་ཞིང་། ནུས་ཤུགས་ཡོད་རྒུས་ཡུལ་ཤུལ་གྱི་གནོད་ཤུལ་འཛུགས་སྐྲུན་བྱེད་པའི་གོམ་སྟབས་ཇེ་མགྱོགས་སུ་བཏང་སྟེ། གནོད་ཐེབས་བོད་རིགས་མང་ཚོགས་རྣམས་ཀྱི་བདེ་འཇགས་དང་འཚོ་བར་ཁྱོན་ཡོངས་ནས་ཁག་ཐེག་བྱས་ཡོད།

གསལ་བཤད།
བརྗོད་དུམ་དེའི་དོན་ནི། མེས་རྒྱལ་དེ་མཐུན་སྒྲིལ་བརྟན་བརླིང་ཡིན་པ་དང་གཅིག །མི་རིགས་ཀྱི་དབྱེ་བ་མེད་པར་ནུས་ཤུགས་ཡོད་དགུས་ཡོམ་འགོག་བྱས་པ་དང༌གཉིས། སླད་མར་ཡང་གང་མགྱོགས་འཛུགས་སྐྲུན་བྱེད་རྒྱུ་ཡིན་པ་བཅས་ལས། དོན་གྱིས་ཏཱ་ལའི་རུ་ཚོགས་ལ་རྒོལ་ལན་དྲག་པོ་ཞིག་སྤྲོད་ཡོད་ཅེས་བཤད་པ་ཡིན་ནམ་སྙམ་སྟེ། སྤྱིར་རྩོམ་ཡིག་དེའི་ནང༌། གོ་མ་བདེ་བ་དང༌རྡོག་མ་འདྲིལ་བ། གོ་རིམ་ཡག་པོ་མེད་པར་། བརྗོད་དོན་གཅིག་ཉིད་ཁྱི་ཡིས་གཅིན་པ་གཏོང་བ་ལྟར་གང་སར་གཏོར་འདུག་པས། ལན་ཁ་ཤས་བསྐྱར་བཤད་བྱེད་དགོས་པའམ་སྔོན་མ་དེས་འཐུས་པར་བྱེད་དགོས་ཆ་མ་འཚལ་བའི་དཀའ་ངལ་ཞིག་འདུག

དེས་ན། མེས་རྒྱལ་དེ་མཐུན་སྒྲིལ་བརྟན་བརླིང་ཡིན་མིན་དེ་༢༠༠༨ ལོའི་༣།༡༤ དང་༧།༥ ཡི་དོན་རྐྱེན་ལས་ཇེ་གསལ་གྱུར་པ་དང༌། ལྷག་པར་རྒྱ་ནག་གཞུང་གིས་མི་རིགས་ཀྱི་ལྟ་བ་རྒྱ་ཆེར་སྤེལ་བའི་རྐྱེན་གྱིས། ད་ཆ་མེས་རྒྱལ་དེ་དཀྱིལ་ཤར་ཡུལ་གྲུའི་ནང་གི་མི་རིགས་བར་གྱི་དཀའ་རྙོག་ལྟར་གྱུར་ཡོད་པ་མི་མང་པོས་རྗོད་བཞིན་ཡོད། དེའི་སྐོར་མང་པོ་ཤོད་ཀྱི་མིན། སྐབས་དོན་ལས་གཞན་དུ་གྱུར་འགྲོ་ཡི་རེད། དོན་དག་དེ་ཁོ་ནའི་ཐོག་ལེ་ཚན་ཅིག་ཟུར་དུ་བཤད་ན་མ་གཏོགས་དེིའི་སྐོར་དེ་དཔྱིས་ཕྱིན་པ་ཞིག་ཡོང་ཐུབ་ཀྱི་མ་རེད།

གཞན་ཡང༌། རྒྱལ་ཡོངས་མི་དམངས་ཀྱིས་མི་རིགས་ཀྱི་དབྱེ་བ་མི་དགར་བར་ནུས་ཤུགས་ཡོད་རྒུ་བཏོན་ནས་ཡུལ་དེའི་བོད་རིགས་སྤུན་ཟླ་རྣམས་ལ་རྒྱབ་རོགས་གནང་ཡོད་ཟེར། འོ་ན། གོང་དུ་བཤད་པ་ལྟར། ཟི་ཁྲོན་དུ་ཡོམ་འགོག་བྱས་པ་ལྟར་བོད་ལ་མ་བྱས་པའི་རྒྱུ་མཚན་གང་ཡིན་ནམ། སྐྱེ་དགུ་རྟ་རྒྱུག་ཐང་ལ་གནམ་ཐོག་ནས་མྱུར་སྐྱོབ་དམག་མི་མཆོང་འབབ་མི་ལོ་བ་གང་ཡིན་ནམ། ཐད་འབུར་གནམ་གྲུ་མ་གཤོང་བ་ཡིན་ནམ། མང་པོ་བཤད་དགོས་དོན་མེད། གོ་ཐོས་ཤིག་ལ། སྲིད་བློན་ཝུན་གྱིས་གནམ་གྲུ་གཏོང་དགོས་པའི་བཀའ་བཏང་ཡང༌། སྲིད་འཛིན་ཧུ་ཡི་བཀའ་མེད་སྟབས་གནམ་གྲུ་གཏོང་མ་ཐུབ་པ་རེད་ཟེར། དེ་བདེན་པ་ཡིན་མིན་ངས་མི་ཤེས། གང་ལྟར་གནམ་ཐོག་ནས་མྱུར་སྐྱོབ་མ་བྱས་པ་དེར་བོད་མི་རྣམས་བློ་ཕམ་བཅུག་ཡོད།

དེ་བཞིན། གནོད་ཐེབས་བོད་རིགས་མང་ཚོགས་རྣམས་ཀྱི་བདེ་འཇགས་དང་འཚོ་བར་ཁྱོན་ཡོངས་ནས་ཁག་ཐེག་བྱས་ཡོད་ཟེར་བ་ཡང་རྣམ་པར་ཕྱེ་དགོས། ས་ཡོམ་བྱུང་ནས་ཉིན་ཤས་རྗེས་ཟ་གྱོན་ཀྱི་རོགས་རམ་ཤུགས་ཆེན་པོ་སླེབས་ཡོད་པ་བདེན་པ་རེད། འོན་ཀྱང་དངོས་ཟོག་དེ་དག་མང་ཆེ་བ་ཇ་དང་རྩམ་པ། ཕྱུར་བ་དང་བག་ལེབ་སོགས་བོད་ཟས་ཡིན་པ་དང༌། དངོས་ཟོག་དོ་པོ་དེ་དག་གི་སྟེང་ཅིག་ཅིག་དགོན་པ་དང༌། གཉིས་གཉིས་སྡེ་པ་ཞེས་བྲིས་པ་ལས། ཀྲུང་དབྱང་ཏང་ཨུད་དང་རྒྱལ་སྲིད་སྤྱི་ཁྱབ་ཁང་ཟེར་བྲིས་པ་མཐོང་མ་བྱུང༌། དེ་རིང་གཞི་ནས་རྒྱ་ནག་ནས་ཁུར་ཡོང་བ་ཡིན་ན་སྙམ་པ་འགའ་མཐོང་རྒྱུ་འདུག་མོད། གང་ལྟར་དེ་རིང་ཉིན་མ་བཅོ་ལྔ་སོང་ཟིན་ཡང་། ད་དུང་གནོད་ཐེབས་གྲོང་གསེབ་ཁག་ཏུ་རོགས་རམ་སླེབས་མི་འདུག་ཅེས། ས་གནས་རང་གི་མི་ཡིས་རྗོད་བཞིན་པ་རེད།

ཆེད་རྩོམ།
དེའི་ནང་དུ་ཡུལ་དེའི་དགེ་འདུན་པ་རྣམས་ཀྱིས་འདས་པོ་རྣམས་ལ་སྦྱིན་སྲེག་བཏང་ནས་བསྔོ་སྨོན་ཞུས་པ་དང་། པཎ་ཆེན་སྐུ་ཕྲེང་བཅུ་གཅིག་པ་ཨེར་ཏི་ནི་ཆོས་ཀྱི་རྒྱལ་པོ་མཆོག་གིས་པེ་ཅིང་དགོན་སེར་ནུབ་མར་སྤེལ་བའི་ཆོས་ཚོགས་སོགས་འདུས་ཡོད་ལ། རྒྱལ་ནང་ནས་ཆོས་ལུགས་ལས་རིགས་ཀྱིས་འདས་བསྔོ་དང་སྨོན་ལམ་འདེབས་པའི་འབྲེལ་ཡོད་བྱེད་སྒོ་སྤེལ་བ་མཐའ་དག་གིས་བོད་རིགས་སྤུན་ཟླ་རྣམས་ལ་བསམ་པའི་རྒྱགས་ཕྱེ་ཡག་པོ་ཅིག་བསྩལ་ཡོད་པ་རེད།

གསལ་བཤད།
ཡུལ་དེའི་དགེ་འདུན་པ་རྣམས་ཀྱིས་འདས་པོ་རྣམས་ལ་སྦྱིན་སྲེག་བཏང་ནས་བསྔོ་སྨོན་ཞུས་པ་དང་རྒྱ་ནག་གཞུང་བར་འབྲེལ་བ་ཅི་ཞིག་ཡོད་དམ། གལ་སྲིད་དེ་ལྟར་བྱེད་པར་རྒྱ་ནག་གཞུང་གི་ངོས་ནས་བཀག་སྡོམ་བྱས་མེད་ཅེས་ངོ་སོ་བཏོད་པ་ཡིན་ན་ནི། དེ་ཙམ་ཞིག་གིས་གཞན་ལ་ངོ་སོ་བྱེད་པའི་དུས་ཤར་བར་ཁས་བླངས་པས། ཡུལ་དེར་ནམ་རྒྱུན་ཆོས་ལུགས་ཐོག་དམ་དྲག་ཇི་ཙམ་ཡོད་པ་དེ་དོན་གྱིས་དཔོག་ཐུབ་པ་མ་ཡིན་ནམ།

པཎ་ཆེན་རྒྱལ་མཚན་ནོར་བུས་རྒྱ་ནག་ནས་འདས་བསྔོ་གནང་བ་དེས་བོད་རིགས་སྤུན་ཟླ་རྣམས་ལ་བསམ་པའི་རྒྱགས་ཕྱེ་ཡག་པོ་ཆགས་ཀྱི་ཡོད་ན། བོད་གངས་ཅན་པ་ཡོངས་ཀྱི་འདི་ཕྱིའི་སྐྱབས་གནས་༧གོང་ས་རྒྱལ་བ་རིན་པོ་ཆེ་མཆོག་དང༌། དཔལ་རྒྱལ་བའི་དབང་པོ་ཀརྨ་པ་མཆོག །ས་སྐྱ་གོང་མ་རིན་པོ་ཆེ་ལ་སོགས་པ་བོད་ཕྱི་ནང་གཉིས་ན་རྩོད་མེད་ཡོངས་གྲགས་ཀྱི་ས་དགེ་བཀའ་རྙིང་བོན་དང་བཅས་པའི་བོད་ཀྱི་བླ་ཆེན་རྣམ་པ་དབུ་བཞུགས་ཀྱིས། རྒྱ་གར་འཕགས་པའི་ཡུལ་ནས་བསྔོ་སྨོན་གནང་བ་དེས་བོད་རིགས་སྤུན་ཟླར་བསམ་པའི་རྒྱགས་ཕྱེ་མི་འགྱུར་དོན་ཅི་ཡིན་ནམ། ཡང་ན། ཏཱ་ལའི་རུ་ཚོགས་ཀྱིས་གནོད་ཐེབས་མང་ཚོགས་དང་བོད་རིགས་སྤུན་ཟླ་རྣམས་ཀྱི་ཕྱིར་དུ་ཅི་ཞིག་བསྒྲུབ་སོང་ངམ་ཞེས་པའི་དྲི་བ་དེ། པེ་ཅིན་ན་བཞུགས་བཞིན་པའི་པཎ་ཆེན་རྒྱལ་མཚན་ནོར་བུ་ལ་ཡང་དྲིས་ཤིག

བཙན་བྱོལ་ནང་ནས་བོད་རིགས་སྤུན་ཟླར་བསམ་པའི་རྒྱགས་ཕྱེ་སྩལ་སྟངས་དྲ་ཐག་འདི་དག་ལས་རོབ་ཙམ་མཐོང་ཐུབ།
http://www.youtube.com/watch?v=6d4OIo31k1I&feature=related
http://www.youtube.com/user/VOAKunleng#p/u/2/c6PzkktPSy0

འཕྲོས་མུ་མཐུད།
Read more!

ཏཱ་ལའི་བླ་མ་དང་རྒྱ་ནག་གཞུང་གཉིས་སུ་ཞིག་གིས་སྐྱོ་གར་འཁྲབ་བཞིན་ཡོད་དམ།

ད་ནང་རང་ཉིད་དྲ་བ་ནང་འཛུལ་སྐབས་ཐེན་ཞའོ་དབྱི་མིང་ཅན་ཞིག་གིས"ཏཱ་ལའི་ཡུལ་ཤུལ་དུ་ཕྱིན་ནས་སྐྱོ་གར་ཡང་བསྐྱར་འཁྲབ་འདོད་ཡོད་པ"ཞེས་པའི་ཆེད་རྩོམ་དེ་མཐོང་བས་ལམ་སང་ཐེངས་གཅིག་བཀླག་པ་དང༌། དེ་ནས་ལས་ཀ་འགྲོ་དགོས་སྟབས་བྲེལ་འཚུབ་ངང་ཕྱིན་པ་ཡིན། ལས་ཀའི་རིང་དེའི་སྐོར་བསམ་བློ་ཡང་ཡང་འཁོར་ཞིང༌། འཕྲུལ་ཆས་ནས་མཉེན་ཆས་ཆ་འཕྲིན་དུས་རབས་སུ་འཕོ་བའི་སྐབས་འདི་འདྲ་ཞིག་ལ་ཡང༌། མི་རྣམས་ཀྱི་མིག་དང་རྣ་བ་བཀབ་འདོད་ཀྱི་བསམ་བློ་དེ་ཇི་ལྟར་བྱུང་བ་ཡིན་ནམ་སྙམ་ནས་མཚམས་རེར་ཡ་མཚན་ཀྱང་སྐྱེས། གང་ལྟར་དེའི་སྐོར་གསལ་བཤད་ཅིག་བྱེད་འདོད་བྱུང་བས་འདིར་དུས་ཚོད་བྱུང་རིམ་བཞིན་འགོད་རྒྱུ་ཡིན།

ཆེད་རྩོམ་དེའི་ནང༌།
གློ་བུར་དུ་བྱུང་བའི་ས་ཡོམ་གྱིས་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་གྱི་ཡུལ་ཤུལ་རྫོང་གི་མིའི་ཚེ་སྲོག་དང་རྒྱུ་ནོར་ལ་གྱོང་གུད་ཚབས་ཆེན་བཟོས་ཡོད་པ་རེད། ཡུལ་དེར་རྒུད་སྐྱོབ་བྱེད་པའི་གཏམ་དེ་རྒྱལ་ཡོངས་མི་དམངས་ཀྱིས་ཐོས་པར་བརྟེན། མཚོ་བོད་མཐོ་སྒང་གི་དབུས་སུ་རང་བྱུང་གི་གནོད་འཚེ་དང་འཐབ་རྩོད་བྱེད་པའི་གཡུལ་འགྱེད་ཆེན་པོ་ཞིག་གཤོམ་འགོ་ཚུགས་པ་རེད།

གསལ་བཤད།
གློ་བུར་དུ་ས་ཡོམ་བྱུང་ནས་མི་རྒྱུ་ཟོག་གསུམ་ལ་གྱོང་གུད་ཚབས་ཆེན་བཟོས་པ་བདེན་པ་རེད། དེའི་སྐོར་གང་ཡང་བཤད་དགོས་མེད། འོན་ཀྱང་རང་བྱུང་གི་གནོད་འཚེ་དང་འཐབ་རྩོད་བྱེད་པའི་གཡུལ་འགྱེད་དེའི་ནང་མདུན་དུ་མཆོང་མཁན་གྱི་དཔའ་བོ་དེ་བཅིངས་གྲོལ་དམག་དེ་ཚོ་ཡིན་ནམ། ཡང་ན་ས་གནས་དགོན་སྡེ་ཁག་གི་གྲྭ་བཙུན་རྣམ་པ་ཡིན། འདི་ལ་བཤད་སྟངས་མི་འདྲ་བ་གཉིས་ཡོད་ཅིང༌། གཅིག་རྒྱ་ནག་གཞུང་དང་གཞན་དེ་ནུབ་ཕྱོགས་དང་ཤར་ཕྱོགས་ཀྱི་སྨྲ་བརྗོད་རང་དབང་ཡོད་པའི་རྒྱལ་ཁབ་ཁག་གི་ཤོད་སྟངས་དེ་རེད། དེ་མིན་རྒྱ་རིགས་མང་པོ་ཞིག་གིས་རང་རང་གི་དྲ་རྒྱ་ནང་། ད་རེས་བོད་ཀྱི་གྲྭ་བཙུན་ལ་དཔའ་བོའི་ཆེ་བསྟོད་བྱས་པ་དེ་འདྲ་མང་པོ་མཐོང་རྒྱུ་འདུག

ད་དུང་ས་ཡོམ་གྱི་ཤུགས་ཚད་དེ་ལ་ཡང་བཤད་སྟངས་གཉིས་ཡོད་ཅིང་། གཅིག་དེ་རྒྱ་ནག་གཞུང་དང༌གཞན་དེ་གཙོ་བོ་ནུབ་ཕྱོགས་པ་རྣམས་དང་ཤར་ཕྱོགས་པ་གཞན་དག་རྣམས་ཀྱི་ཤོད་སྟངས་དེ་རེད། འདིའི་ཐད་རྒྱ་ནག་གཞུང་གིས་འཛུགས་སྐྲུན་གྱི་སྤུས་ཚད་ལ་སྐྱོན་བརྗོད་འགོག་ཆེད་ས་ཡོམ་གྱི་ཤུགས་ཚད་དེ་སྤར་ཡོད་པའི་དོགས་པ་བྱེད་མཁན་མང་པོ་ཡོད། དེ་ལ། ཤར་ནུབ་གཉིས་བར་རིག་གཞུང་དང་གོམས་སྲོལ་མི་འདྲ་བ་ཡོད་པ་ནང་བཞིན་ཚན་རིག་དང་འཕྲུལ་ཆས་ཀྱང་མི་འདྲ་བ་ཡོད་པ་ཡིན་ནམ། ཡང་ན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དང་དེ་མིན་རྒྱལ་ཁབ་ཁག་གི་བར་ཚན་རིག་ལ་ཡང་མི་འདྲ་བ་ཡོད་པ་ཡིན་ནམ། གང་ལྟར་དེའི་སྐོར་གསལ་བཤད་མཐིལ་ཕྱིན་པ་ཞིག་དགོས་པ་གལ་ཆེན་པོ་རེད།

ཆེད་རྩོམ།
ཤི་གསོན་གྱི་དཀའ་གནད་ལ་ཐུག་པའི་གནད་འགག་གི་སྐབས་འདིར། ཏཱ་ལའི་ཡིས་ནུབ་ཕྱོགས་རྒྱལ་ཁབ་ཀྱི་བསམ་ངན་བཅངས་པའི་མཚམས་སྦྱོར་ཚན་པ་འགའ་དང་ངན་པ་མཉམ་རུབ་ཀྱིས། ཡུལ་ཤུལ་དུ་ཕྱིན་ནས་གནོད་ཐེབས་མང་ཚོགས་ལ་སེམས་གསོ་བྱེད་རྒྱུ་ཡིན་ཟེར་བཞིན་དུ། རྒྱ་བོད་གཉིས་ཀྱི་འབྲེལ་བ་བེད་སྤྱོད་པའི་རེ་ངན་བཅངས་ཡོད་ཅིང་། གནོད་ཐེབས་མང་ཚོགས་ཤི་རྨས་ཀྱི་དཀའ་སྡུག་ལ་འཕྲད་པའི་གོ་སྐབས་སྤྱད་དེ་མི་རྣམས་ཀྱི་ཡིད་སེམས་འགུག་བསམ་པ་རེད།

གསལ་བཤད།
འཛམ་གླིང་འདིར་མི་སུ་འདྲ་ཞིག་ཡིན་ཀྱང་། གནས་སྟངས་དེ་འདྲའི་འོག་གནོད་ཐེབས་མང་ཚོགས་ལ་སེམས་གསོ་བྱེད་པ་ནི་མི་ཆོས་དང་མཐུན་པ་ཞིག་ཡིན་ན། ཏཱ་ལའི་བླ་མ་ནི་དེ་ལས་ཀྱང་ཨ་ཅང་ཅང༌། ད་རེས་ཏཱ་ལའི་བླ་མ་གནོད་འཚེ་ཕོག་ཡུལ་ལ་དངོས་སུ་ཕེབས་ནས་སེམས་གསོ་དང་ཐུགས་སྨོན་གནང་རྒྱུ་ནི། དམ་པ་ལྷ་ཆོས་དང་འཇིག་རྟེན་མི་ཆོས་གང་ཡིན་ཀྱང་ལུགས་དང་མཐུན་པ་ཞིག་ཡིན་པར་ཧོང་ཀོང་གི་གསར་ལམ་ཁག་ནང་ཡང་བྲིས་འདུག །རང་གི་ནང་མི་སྤུན་མཆེད་འདས་གྲོངས་སོང་བའི་ཕྱི་སྡོད་ཡུལ་ཤུལ་བ་ཡོངས་ཀྱིས་༧གོང་ས་མཆོག་ཁུལ་དེར་ཆིབས་སྒྱུར་ཡོང་བའི་གསོལ་བ་བཏབ་པ་དང། གནོད་ཐེབས་མི་མང་ཚོའི་ངོས་ནས་ཀྱང་སྐྱབས་དང་རེ་ས་༧གོང་ས་མཆོག་ལས་གཞན་སུ་ཡང་མེད་པ་ནི་གཤམ་གྱི་བརྙན་འཕྲིན་འདི་དག་ལས་ཤེས་ཐུབ།
http://www.youtube.com/watch?v=Oir5CTCg-8s

http://www.youtube.com/watch?v=L9B0ogqDsEk&feature=related

ནུབ་ཕྱོགས་མཚམས་སྦྱོར་ཚན་པ་དང་ངན་པ་མཉམ་རུབ་བྱེད་པ་ཟེར་བ་ནི། རང་དཔེ་གཞན་ལ་འགེལ་བ་རང་རེད། རྒྱ་ནག་གཞུང་རང་གིས་ལས་དོན་ག་རེ་ཡིན་ན་ཡང་མཚམས་སྦྱོར་ཚན་པ་དང་མཉམ་རུབ་བྱེད་དེ་མི་རྣམས་མགོ་སྐོར་གཏོང་ཐབས་བྱེད་པ་འདྲ་བ་ནུབ་ཕྱོགས་སུ་ཨེ་ཡོད་ན། ས་ཡོམ་བརྒྱབ་པའི་ཉིན་མོ་དེ་ག་རང་ལ་མཚོ་སྔོན་དུ་གཉུག་མ་གནས་པ་དང་གསར་དུ་སླེབས་པའི་གསར་འགྱུར་ལས་རིགས་སོ་སོའི་འགན་ཁུར་བ་ཞུགས་པའི་གསར་འགྱུར་མཐུན་སྦྱོར་གྱི་ཁྱབ་སྒྲོག་ཚོགས་འདུ་ཟེར་བ་ཚོགས་པ་དང༌། དེར་ཞིང་ཆེན་ཏང་ཨུའི་རྒྱུན་ལས་ཨུ་ཡོན་དང་དྲིལ་བསྒྲགས་ལྷན་ཁང་གི་འགན་འཛིན་ཅི་ཏིས་མཱ་ཅཱ་ཡིས། "གསར་འགྱུར་དྲིལ་སྒྲོག་བྱེད་པར་ས་འགུལ་གནོད་སེལ་རྒུད་སྐྱོབ་དཀྱིལ་སྙིང་དུ་འཛིན་པ་དང་། མི་དམངས་ལ་འགན་ཆེན་པོ་འཁུར་བའི་རྣམ་འགྱུར་གྱིས་གླེང་ཕྱོགས་སྣེ་ཁྲིད་ལ་ཤུགས་སྣོན་དང་གནོད་ཐེབས་ས་ཁུལ་གྱི་གནས་ཚུལ་ལ་དོ་སྣང་བྱས་ཏེ། དྲིལ་སྒྲོག་བྱ་བའི་ཆབ་སྲིད་འདུ་ཤེས་དང་འགན་འཁྲིའི་འདུ་ཤེས། ཆེ་ཕྱོགས་འདུ་ཤེས་བཅས་ཇེ་དྲག་ཏུ་གཏོང་བ་དང་། ཞིང་ཆེན་ས་འགུལ་གནོད་སེལ་རྒུད་སྐྱོབ་བཀོད་འདོམ་པུའུ་ཡི་གཅིག་གྱུར་བཀོད་འདོམ་ལྟར། དུས་ལྟར་ས་འགུལ་གྱི་གནས་ཚུལ་དང་གནོད་སེལ་རྒུད་སྐྱོབ་སོགས་འབྲེལ་ཡོད་གནས་ཚུལ་གྱི་དྲིལ་སྒྲོག་བྱ་བ་བཟང་བོར་སྒྲུབ་དགོས"ཞེས་བཤད་ཡོད།

དྲངས་མ་ཐག་པའི་ལུངས་དེ་ལས་ཤེས་ཐུབ་པ་ནི། ས་ཡོམ་ཁྲོད་ཀྱི་མི་སྲོག་སྐྱོབ་རྒྱུ་ལས་ཆབ་སྲིད་ཀྱི་འགན་འཁྲི་ཁུར་བའི་ཐོག་ནས་གླེང་ཕྱོགས་སྣེ་ཁྲིད་ལ་ཤུགས་སྣོན་ཐེབས་པའི་དྲིལ་བསྒྲགས་གཙོ་བོར་འཛིན་ཡོད་པ་དེ་རེད། དེ་བཞིན་མི་དམངས་ལ་འགན་ཆེན་པོ་འཁུར་བའི་རྣམ་འགྱུར་གྱིས་གླེང་ཕྱོགས་སྣེ་ཁྲིད་ལ་ཤུགས་སྣོན་ཐེབས་ཐུབ་པའི་གསར་འགྱུར་སྤེལ་དགོས་པར་བཤད་པ་དེས། མི་མང་གི་ཡིད་སེམས་འགུག་བསམ་པ་ཟེར་བ་དེ་ཡང་རང་དཔེ་གཞན་འགེལ་ཡིན་པ་ལྷང་ལ་བུད་མི་འདུག་གམ། པེ་ཅན་གཞུང་རང་ནས་ས་ཡོམ་སྐོར་གྱི་ཚོགས་འདུ་ཐེངས་དང་པོ་དེ་ཡང་དྲིལ་བསྒྲགས་བྱེད་སྟངས་སྐོར་རེད་འདུག །དེས་ག་རེ་མཚོན་གྱི་ཡོད་རེད།

ང་རང་ནུབ་ཕྱོགས་ཀྱི་གསར་འགྱུར་འགོད་སྟངས་ཐད་ཀྱི་ཟབ་སྦྱོང་མང་པོའི་ནང་ཞུགས་མྱོང༌། འགྲོ་བ་མི་ཞིག་ཡིན་ན་རང་ཉིད་ལ་བདེན་རྫུན་ཤེས་ཆོག་པའི་རང་དབང་དང་ཐོབ་ཐང་ཡོད་པ་བཞིན། གསར་འགོད་པ་ཞིག་གིས་གཙོ་བོར་དོན་དངོས་གང་ཡིན་པ་དེ་དྲང་བདེན་གྱི་ལམ་ནས་འགོད་དགོས་ཟེར་བ་ལས། ཆབ་སྲིད་ཀྱི་འདུ་ཤེས་དང་། རྣམ་འགྱུར་སྟོན་ཐབས། གླེང་ཕྱོགས་ཀྱི་སྣེ་ཁྲིད་ཐུབ་ཐབས་བྱེད་དགོས་ལུགས་བཤད་པ་གཏན་ནས་གོ་མ་མྱོང་ལ། འདུ་ཤེས་དང་བསམ་ཚུལ་དེ་རིགས་ནི་ནུབ་ཕྱོགས་པའི་ལྟ་ཚུལ་ལྟར་བྱས་ན་གསར་འགོད་པས་སྤང་བྱ་གཙོ་བོ་རྣམས་རེད།

ཆེད་རྩོམ།
ཟླ་༤ ཚེས་༢༠ ཉིན་ཕྱི་འབྲེལ་པུའུ་ཡི་མགྲིན་ཚབ་པ་ཅང་ཡུས་ཀྱིས་གསར་འགྱུར་ཁྱབ་སྒྲོག་ཚོགས་འདུའི་སྟེང་ཏཱ་ལའི་ཡིས་ཡུལ་ཤུལ་གྱི་གནོད་ཐེབས་ས་ཁུལ་དུ་འགྲོ་རྒྱུ་ཡིན་ཞེས་བཤད་པའི་སྐོར་གྱི་བཤད་ཚུལ་ལ་ལན་བཏབས་པ་རེད།

གསལ་བཤད།
འདི་རྫུན་རེད། སྐབས་དེར་གསར་འགོད་པས་དྲི་བ་ག་ཚོད་བྲིས་ཀྱང་ཅང་ཡུས་ཀྱིས་གཡོལ་ཐབས་ཁོ་ན་བྱས་པ་ལས་ལན་བཏབ་མེད་པ་ཡོངས་གྲགས་རེད། ང་ཚོས་ཀྱང་བརྙན་འཕྲིན་ལས་མཐོང་ཐུབ། གསར་འགོད་པ་ཁ་ཤས་ནས་སྐབས་དེར་ཅང་ཡུས་ལ་དེའི་སྐོར་ལན་འདེབས་ཐལ་མི་ཆོག་པའི་བཀའ་རྒྱ་ཕབ་ཡོད་པའི་ཚོར་སྣང་བྱུང་འདུག །འོན་ཀྱང་ལན་མ་བཏབ་པ་དེ་ག་རང་ལན་ཡིན་པས་གོ་རྒྱུ་དེ་གོ་ཡོད་པ་རེད།

ཆེད་རྩོམ།
ཅང་ཡུས་ཀྱིས་འདི་སྐད། དེང་སྐབས་ཀྲུང་གོ་སྲིད་གཞུང་དང་། རྒྱལ་ཡོངས་མི་དམངས་ཀྱིས་ནུས་ཤུགས་ཡོད་རྒུས་གནོད་འགོག་རྒུད་སྐྱོབ་བྱ་བ་ལེགས་པོར་སྒྲུབ་བཞིན་ཡོད་དེ། ཕྱིར་སྡོད་བོད་མི་སྤུན་ཟླ་ཚུད་པའི་རྒྱལ་ཕྱིའི་ཀྲུང་གོ་བ་རྣམས་ཀྱི་སེམས་པ་གནོད་ཁུལ་དུ་ཕྱོགས་ཤིང་། ཁོ་ཚོས་རྣམ་པ་མི་འདྲ་བའི་སྒོ་ནས་དོ་ཁུར་དང་མཚམས་འདྲི་བྱེད་ཀྱི་ཡོད། ད་ལྟའི་གནས་ཚུལ་ལ་གཞིགས་ན་རྒུད་སྐྱོབ་བྱེད་པའི་མི་ཤུགས་གིས་འདང་ཡོད་པ་དང་། རྒུད་སྐྱོབ་དངོས་རྫས་ཡང་རྒྱུན་ཆད་མེད་པར་ས་ཡོམ་བྱུང་ཁུལ་དུ་བསྐྱལ་དང་སྐྱེལ་བཞིན་ཡོད།

གསལ་བཤད།
འདི་ཕྱེད་ཀ་བདེན་པ་དང་ཕྱེད་ཀ་རྫུན་མ་རེད། ༢༠༠༨།༥།༡༢ ཉིན་གྱི་སི་ཁྲོན་ཡོམ་འགོག་དང་བསྡུར་ན་ཁྱད་པར་ཆེན་པོ་ཡོད། སི་ཁྲོན་དུ་ས་ཡོམ་བྱུང་བའི་ཉིན་དེ་གར་ཐད་འཕུར་གནམ་གྲུ་༢༠ བཏང་སྟེ་མྱུར་སྐྱོབ་བྱས་ཤིང༌། ཚེས་༡༥ ཉིན་ཡང་བསྐྱར་ཐད་འཕུར་གནམ་གྲུ་འཕར་མ་༩༠ མངགས་ཏེ་(སྲིད་བློན་ཝུན་གྱི་བཀའ་རྒྱ་ནང་ཐད་འཕུར་གནམ་གྲུ་༩༠ ལས་མང་བ་གཏོང་ཞེས་འཁོད་འདུག)མཐའ་ཁུལ་ཁག་ཏུ་མྱུར་སྐྱོབ་དངོས་རྫས་གཡུགས་པ་དང་། རྨས་མ་སྨན་ཁང་དུ་དབོར་བ་སོགས་བྱས་ཡོད། དེ་བཞིན་དམག་མི་མང་པོ་གནམ་ཐོག་ནས་གཡུག་སྟེ་མྱུར་སྐྱོབ་ལས་འགུལ་ཛ་དྲག་ངང་སྤེལ་ཡོད་ཀྱང༌། སྐྱེ་དགུ་ལ་ཐང་ཆེན་དེ་ག་འདྲ་པོ་ཡོད་ཀྱང་གནམ་ནས་མི་གཅིག་འབབ་མཁན་བྱུང་མེད་ལ། ཐད་འཕུར་གནམ་གྲུའི་གྲིབ་མ་ཙམ་ཡང་མཐོང་རྒྱུ་མེད། དེས་ན་རྒྱལ་ཡོངས་མི་དམངས་ཀྱིས་ནུས་ཤུགས་ཡོད་རྒུས་གནོད་འགོག་རྒུད་སྐྱོབ་བྱ་བ་ལེགས་པོར་སྒྲུབ་བཞིན་ཡོད་ཟེར་ན་ཐལ་དྲགས་པ་མ་རེད་དམ། དེ་ལ་གསལ་བཤད་ཅི་ཞིག་ཡོད་དམ། ཡང་ན་མི་རིགས་མི་འདྲ་བས་རྐྱེན་གྱིས་རྣམ་པ་མི་འདྲ་བའི་སྒོ་ནས་འཚམས་འདྲི་བྱས་ཟེར་བ་དེ་ཡིན་ནམ། ཟི་ཁྲོན་ལ་གནམ་ཐོག་ནས་མྱུར་སྐྱོབ་བྱས་པ་གཤམ་གསལ་དྲ་ཐག་འདི་ནས་གཟིགས།

http://www.youtube.com/watch?v=SUkcMhfR000

http://www.youtube.com/watch?v=T-vQ2AF0PCo&NR=1

ཆེད་རྩོམ།
གནོད་ཐེབས་མང་ཚོགས་རྣམས་ལ་སྨན་བཅོས་སྲོག་སྐྱོབ་དང་གནས་སྐབས་ཀྱི་སྡོད་གནས་ཡོད་པ་དང་། དུས་མཚུངས་སུ་སྲིད་གཞུང་གིས་ཡུལ་དེའི་མང་ཚོགས་ཀྱི་ཆོས་ལུགས་དད་མོས་དང་ཡུལ་སྲོལ་གོམས་འདྲིས་ལ་བརྩི་བཀུར་བྱས་ཡོད་པ་མ་ཟད། གནོད་པ་ཐེབས་པའི་མང་ཚོགས་ཀྱི་སེམས་ཁ་གསོ་བའི་ལས་དག་གོ་རིམ་ལྡན་པར་སྒྲུབ་བཞིན་ཡོད་ལ། ཆོས་ལུགས་ལས་རིགས་ཁག་གི་གསོལ་འདེབས་དང་སྨོན་ལམ་གསུང་བའི་འབྲེལ་ཡོད་བྱེད་སྒོ་དག་ཀྱང་གཅིག་འཕྲོར་གཅིག་མཐུད་དུ་སྤེལ་བཞིན་ཡོད།

གསལ་བཤད།
འདི་ཡང་ཕལ་ཆེ་བ་རྫུན་མ་རེད། དེ་རིང་ས་ཡོམ་བརྒྱབ་ནས་ཉིན་མ་བཅུ་བཞི་སོང་ཡང་ད་དུང་སྨན་བཅོས་ཀྱི་དཀའ་ངལ་ཆེན་པོ་འདུག །སྨན་པ་སྡོད་སའི་གུར་ཞིག་ཀྱང་མེད་པ་འདྲ། སྨན་པ་རེ་གཉིས་ཕྱི་ལོགས་ན་ཉལ་ཆས་ཀྱིས་གཡོགས་ནས་འདུག་པ་དང༌། ནད་པ་ཧ་ཅང་མང་པོ་ཞིག་བང་རིང་པོ་བསྒྲིགས་ནས་གནམ་གཤིས་གྲང་ངར་ཆེན་པོ་དེའི་ནང་སྒུག་ནས་བསྡད་ཡོད་པའི་འདྲ་པར་དེ་འདྲ་མཐོང་རྒྱུ་འདུག །གཟིགས་འདོད་ན་གཤམ་གྱི་དྲ་ཐག་འདི་ལ་གཟིགས། འདི་ནི་མཚོ་སྔོན་བོད་སྐད་དྲ་བ་ནས་དྲངས་པ་ཡིན། པར་དེའི་གཤམ་དུ་གནོད་ཐེབས་མང་ཚོགས་སྨན་བཅོས་བྱེད་སར་ཡོང་ནས་སྨན་ལེན་བཞིན་པ། ཞེས་བྲིས་འདུག

http://www.qhtb.cn/news/news_view.jsp?id=14152

བོད་པ་སྤྱི་དང་གནོད་ཐེབས་མི་མང་ཚོའི་གོམས་སྲོལ་ལྟར་ན། མི་ཤི་ནས་ཞགས་ཞེ་དགུ་བར་རང་ཁྱིམ་དུ་དགེ་འདུན་པ་རྣམས་གདན་དྲངས་ནས་ཞལ་འདོན་གནང་བཅུག་པ་དང༌། ལྷག་པར་བདུན་ཚིགས་རེ་རེ་བཞིན་བདག་འཇུག་དང་སྦྱང་ཆོག་སོགས་ཆོས་ཕྱོགས་ཀྱི་ཆོ་ག་རྒྱས་པར་བསྒྲུབས་ནས་སྲུང་བརྩི་བྱེད་སྲོལ་ཡོད་ན། གནོད་ཐེབས་ས་ཁུལ་ནས་གྲྭ་བཙུན་ཕྱིར་འབུད་བཏང་བ་དང༌། རང་གི་ཚེ་འདི་ཕྱི་གཉིས་ཀྱི་སྐྱབས་གནས་གདན་ཞུ་མ་བཅུག་པ་སོགས་ཀྱིས། ཆོས་ལུགས་དང་གོམས་སྲོལ་ལ་བརྩི་བཀུར་དང༌། གནོད་ཐེབས་མང་ཚོགས་ཀྱི་སེམས་ཁ་གསོ་བའི་གསོལ་འདེབས་སྨོན་ལམ་རྣམས་དུས་ཐོག་སྒྲུབ་བཞིན་ཡོད་ཟེར་བ་ཡང་རྫུན་དུ་མི་འགྱུར་རམ།

གོང་གི་བརྙན་འཕྲིན་དེ་དག་ལ་གཟིགས་དང༌། རང་རང་གི་ཕ་མ་སྤུན་མཆེད་ཀྱི་ཕུང་པོ་མེར་སྲེག་བཞིན་པའི་སྐབས་ཤུལ་ལུས་ཚོས་སྨོན་ལན་ག་རེ་འདེབས་ཀྱིན་འདུག །གསོལ་བ་སུ་ཞིག་ལ་འདེབས་ཀྱི་འདུག །འཕགས་པ་སྤྱས་རས་གཟིགས་ཀྱིས་ལམ་སྣ་དྲོངས། ༧རྒྱལ་བ་བསྟན་འཛིན་རྒྱ་མཚོས་ལམ་སྣ་དྲོངས། ༧རྒྱལ་བ་བསྟན་འཛིན་རྒྱ་མཚོ་མཁྱེན་་་་༧རྒྱལ་བ་བསྟན་འཛིན་རྒྱ་མཚོ་་་་་༧རྒྱལ་བ་ཐམས་ཅད་མཁྱེན་པ་་་་་་་་༧རྒྱལ་བ་ཐམས་ཅད་མཁྱེན་པ་་་་་་་ཟེར། ༧རྒྱལ་བ་བསྟན་འཛིན་རྒྱ་མཚོ་དང༌། རྒྱལ་བ་ཐམས་ཅད་མཁྱེན་པ་སུ་ཡིན་མ་ཤེས་ན་ཁོང་ནི་ཏཱ་ལའི་བླ་མ་ཞུ་བ་དེ་རེད། དེར་བརྟེན་སྐུ་ཉིད་དང་རྒྱ་ནག་གི་དཔོན་རིགས་ཚོས་༧རྒྱལ་བ་བསྟན་འཛིན་རྒྱ་མཚོ་ལ་ངན་སྨྲས་དང་སྐྱོན་བརྗོད་བྱེད་པ་དེས་གནོད་ཐེབས་མང་ཚོགས་ཀྱི་སེམས་ཁ་གསོ་བ་རེད་དམ། ཡང་ན་སེམས་ཁ་བསད་པ་རེད།

འཕྲོས་མུ་མཐུད།

Read more!

༧རྒྱལ་བ་རིན་པོ་ཆེ་སྐྱེ་དགུ་མདོར་ཕེབས་ཐུབ་མི་སྲིད་པ་དང་སྲིད་པ། དུམ་བུ་གཉིས་པ།

ཡང་ཕྱོགས་གཞན་ཞིག་ནས་བཤད་ན། ད་རེས་རྒྱ་ནག་གཞུང་གིས་༧གོང་ས་མཆོག་ཁུལ་དེར་ཕེབས་བཅུག་སྲིད་པ་དང་། དེའི་རྒྱུ་མཚན་ཡང་མང་པོ་ཡོད་པ་ནས། དགག་ཕྱོགས་ཀྱི་རྒྱུ་མཚན་ཁག་ཅིག་ནི་འདི་ལྟར།

༡།ད་རེས་རྒྱ་ནག་གཞུང་གིས་༧གོང་ས་མཆོག་ཁུལ་དེར་ཕེབས་མ་བཅུག་ན། བོད་མི་རྣམས་སེམས་སྡུག་ཆེན་པོའི་ངང་གནས་ཡོད་སྟབས་འཆི་གསོན་ལ་མི་ལྟ་བར་རྒྱ་ནག་གཞུང་ལ་ངོ་རྒོལ་དྲག་པོ་བྱེད་སྲིད་པ་དང༌། དེ་འདྲའི་ངོ་རྒོལ་ལངས་པ་ཡིན་ན་དེའི་ཤུགས་རྐྱེན་ཐད་ཚོད་དཔག་བྱེད་ཐབས་བྲལ་བ།

༢།ད་རེས་རྒྱ་ནག་གཞུང་གིས་༧གོང་ས་མཆོག་ཁུལ་དེར་ཕེབས་མ་བཅུག་ན། ཆོས་དད་དང་གྲངས་ཉུང་མི་རིགས་ཀྱི་ཡུལ་གོམ་གཤིས་ལུགས་ལ་གུས་བརྩི་སྲུང་སྐྱོབ་བྱེད་བཞིན་ཡོད་པའི་གཞུང་གི་དྲིལ་བསྒྲགས་དེ་ཚོ་ལས་སླ་པོ་ཕམ་ཉེས་ཁེལ་རྒྱུ་ཡིན་པ་དང༌། རྒྱ་ནག་གཞུང་འདི་རྒྱལ་སྤྱིའི་ཐོག་མི་ཡི་རིགས་ཀྱི་དཔལ་ཡོན་ལ་འགྲེལ་བཤད་རྒྱག་པར་ཉམ་དམའ་པོ་ཆགས་རྒྱུ་ཡིན་པ།

༣།ད་རེས་རྒྱ་ནག་གཞུང་གིས་༧གོང་ས་མཆོག་ཁུལ་དེར་ཕེབས་མ་བཅུག་ན། མི་རྣམས་རང་བྱུང་གི་གོད་ཆག་ཐད་མི་ཆོས་རིང་ལུགས་ཀྱི་རོགས་སྐྱོར་ལ་དོ་སྣང་ཆེ་རུ་འགྲོ་བའི་སྐབས་འདིར། འཇིག་རྟེན་མི་ཆོས་ཀྱི་ཐོག་ནས་ཀྱང་རྒྱ་ནག་གུང་ཁྲན་གཞུང་དེ་ཐའེ་ཝན་གོ་མན་ཏང་གཞུང་ལས་ཆེས་ཉམ་ཞན་ཡིན་པར་མངོན་གསལ་དོད་པོ་ཆགས་རྒྱུ་ཡིན་པ་སོགས་རེད།

ཡང་སྒྲུབ་ཕྱོགས་ནས་བཤད་པ་ཡིན་ན།
༡།ད་རེས་༧གོང་ས་མཆོག་གདན་འདྲེན་ཞུས་པ་ཡིན་ན། ཛ་དྲག་རང་གི་ངོ་བོའི་ཐོག་ནས་གདན་འདྲེན་ཞུས་པར་བརྩིས་ཏེ། ཆུང་ས་ནས་བཤད་ན་ཡང༌ཕེབས་བསུའི་རིམ་པ་དང་བཞུགས་གདན་རྒྱག་སྟངས་སོགས་ཀྱི་རྩོད་རྙོག་དེ་ཡང་དགོས་དོན་མེད་པ།

༢།ད་རེས་༧གོང་ས་མཆོག་གདན་དྲེན་ཞུས་པ་ཡིན་ན། གལ་ཏེ་རྒྱ་ནག་གི་དཔོན་རིགས་ཚོར་འདོད་པ་མེད་ཕྱིན། ཛ་དྲག་དང་བསྔོ་སྨོན་ཁོ་ནའི་ཆེད་ཡིན་པས་ཐུག་ཕྲད་སྐབས་ཀྱང་གནད་དོན་གཞན་དག་གླེང་མི་དགོས་པ།

༣།ད་རེས་༧གོང་ས་མཆོག་གདན་འདྲེན་ཞུས་པ་ཡིན་ན། ༧གོང་ས་མཆོག་དང་ངོ་ཐུག་བྱུང་བ་དེས་རྒྱ་ནག་གི་དཔོན་རིགས་ཚོར་མ་འོངས་པར་ཏཱ་ལའི་བླ་མ་ལ་ཚོད་འགམ་ཐུབ་རྒྱུའི་ཕན་ཐོགས་ངེས་ཅན་ཡོད་པ།

༣།ད་རེས་༧གོང་ས་མཆོག་གདན་འདྲེན་ཞུས་པ་ཡིན་ན། རྒྱལ་སྤྱིའི་ཐོག་རྒྱ་ནག་གི་མི་ཆོས་ཀྱི་གཟུགས་བརྙན་ཡག་ཏུ་འགྲོ་ཐུབ་པ་སོགས། གོང་ཞུས་དགག་ཕྱོགས་ཀྱི་སྐྱོན་དེ་དག་ལས་ལྡོག་གི་ཡོད་པ་རེད།

འཕྲོས་རྗེས་མར་གཟིགས།
Read more!

༧རྒྱལ་བ་རིན་པོ་ཆེ་སྐྱེ་དགུ་མདོར་ཕེབས་ཐུབ་མི་སྲིད་པ་དང་སྲིད་པ།

སྤྱིར་བཏང་༧གོང་ས་རྒྱལ་བ་རིན་པོ་ཆེ་རྒྱ་ནག་དང་བོད་ནང་ཕེབས་ཐུབ་མིན་དེ་ཕྱོགས་གཉིས་ཀ་ལ་རག་ལས་པ་ཞིག་ཡིན་ཏེ། གལ་ཏེ་༧གོང་ས་མཆོག་ཕེབས་འདོད་ཡོད་ཀྱང་རྒྱ་ནག་གཞུང་གིས་ཕེབས་མ་བཅུག་ན་དང༌། ཡང་རྒྱ་ནག་གཞུང་གིས་གདན་འདྲེན་ཞུ་འདོད་ཡོད་ཀྱང་༧གོང་ས་མཆོག་ཕེབས་འདོད་མེད་ན་བྱེད་ཐབས་གང་ཡང་མེད་ངེས་རེད། འོན་ཀྱང་ད་རེས་འདི་ལ་༧གོང་ས་མཆོག་ཕེབས་འདོད་ཡོད་ལུགས་གསལ་བསྒྲགས་བྱས་སྟབས། ཁོང་ཕེབས་ཐུབ་དང་མ་ཐུབ་ཀྱི་གནད་འགག་ཡོངས་སུ་རྫོགས་པ་ནི་རྒྱ་ནག་གཞུང་ལ་རག་ལས་ཡོད་པ་ལས། བོད་དང་རྒྱ་ནག་གི་མཁའ་དབྱིངས་སུ་ཨི་སི་ལན་ཌིའི་མེ་རི་འཕྱུར་བའི་དུ་ཞགས་འཁྲིགས་མེད་སྟབས། རྒྱུ་རྐྱེན་གཞན་གཡས་ཁག་གཡོན་དཀྲི་བྱེད་ས་གང་ཡང་བསྡད་མེད་ཅིང༌། རྒྱལ་བ་རིན་པོ་ཆེའི་ཕ་ཡུལ་ཡང་བོད་མཐོ་སྒང་ནས་ཡིན་པས་དེར་གནམ་གཤིས་མི་འཕྲོད་པ་དང་སྲོག་རླུང་གིས་མ་འདང་བའི་འགྲེལ་བརྗོད་ཀྱང་ལན་པོ་རང་མེད་པ་རེད།

༧གོང་ས་རྒྱལ་བ་རིན་པོ་ཆེ་མཆོག་རྒྱ་ནག་གཞུང་གིས་ས་ཡོམ་གྱི་གནོད་འཚེ་ཕོག་ཁུལ་དུ་ཕེབས་བཅུག་དང་མ་བཅུག་དེ་ད་ཆ་མི་རྣམས་ཀྱིས་ཚོད་དཔག་བྱ་ཡུལ་ཞིག་ཏུ་གྱུར་ཅིང༌། ཕེབས་མི་བཅུག་པར་འདོད་མཁན་ཚོས་ཕེབས་མི་བཅུག་པའི་རྒྱུ་མཚན་ག་རེ་བགྲངས་ཀྱི་ཡོད་པ་དང༌། ཕེབས་བཅུག་པར་འདོད་མཁན་ཚོས་དེའི་རྒྱུ་མཚན་ལ་ག་རེ་བགྲངས་ཀྱི་ཡོད་པ་རྣམས་ཤེས་པ་ཡིན་ན། དེའི་བར་ནས་ང་ཚོས་རྒྱུ་མཚན་དང་གནས་ལུགས་ལྡན་ཞིང་གནད་ལ་འབིགས་པའི་ཚོད་དཔག་ཡག་པོ་ཞིག་བྱེད་ཐུབ་ཀྱི་རེད་སྙམ། འོན་ཀྱང་གསར་འགོད་པས་གསལ་ལམ་ཁག་ཏུ་བཀོད་ཚད་དང༌། དཔྱད་བརྗོད་པས་དཔྱད་གཏམ་སྤེལ་ཚད་བཤད་མི་བཏུབ་པས། དེ་ལས་རྒྱུ་མཚན་དང་གནས་ལུགས་ལྡན་པའི་འགྲེལ་བཤད་རྒྱག་སྟངས་འགའ་ཞིག་བརྗོད་ན་གཞན་ལ་ཞར་ལ་ཤེས་ཐུབ།

རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་དེར་ཕེབས་མ་བཅུག་པའི་རྒྱུ་མཚན་མང་པོ་ཡོད་པ་ནས་གཙོ་ཆེ་ཤོས་དེ་ནི། རྒྱ་ནག་གཞུང་ལ་༧གོང་ས་མཆོག་དེར་ཕེབས་བཅུག་པའི་བློ་ཁོག་མེད་པར་རྫུན་རྐུབ་བརྡོལ་བའི་སྐྲག་སྣང་སྐྱེ་ཡི་ཡོད་པ་དེ་རེད། དེ་ཡང་རྒྱ་ནག་གཞུང་གིས་ནམ་རྒྱུན་ནས་དང་། ཡང་ནས་བསྐྱར་དུ་ནས་རྗོད་བཞིན་པ་ཞིག་ལ། བོད་ནང་གི་ཁ་བྲལ་བ་ཉུང་ཤས་མ་གཏོགས་བརྒྱ་ཆ་དགུ་བཅུ་གོ་ལྔའི་བོད་རིགས་མི་མང་རྣམས་གུང་ཁྲན་ཏང་ལ་དགའ་གཞེན་ཡོད་པ་ལས་ཏཱ་ལའི་བླ་མ་ལ་དགའ་པོ་མེད་པ་དང༌། ཏཱ་ལའི་བླ་མས་བོད་མི་མང་གི་ངོ་ཚབ་མཚོན་ཐུབ་ཀྱི་མེད་ལུགས་བཤད་དེ། བོད་རིགས་མི་མང་གི་བདེན་རྒྱབ་ངོ་མ་དེ་གུང་ཁྲན་ཏང་ཁོ་ན་ཡིན་པའི་དྲིལ་བསྒྲགས་བྱེད་བཞིན་པ་དེའི་རྫུན་རྐུབ་བརྡོལ་རྒྱུ་ཐག་ཆོད་ཡོད་པས་རེད།

དེ་ཡང་ཞིབ་ཙམ་བཤད་ན། གལ་སྲིད་༧གོང་ས་རྒྱལ་བ་རིན་པོ་ཆེ་སྐྱེ་དགུ་མདོར་ཕེབས་པ་ཡིན་ན། བོད་མདོ་དབུས་ཁམས་གསུམ་གྱི་མི་མང་ཧ་ཅང་མང་པོ་ཞིག་དེར་འཛོམ་རྒྱུ་ཐག་ཆོད་པ་དང༌། ས་ཁུལ་དེ་བོད་མདོ་དབུས་ཁམས་གསུམ་གྱི་དབུས་དཀྱིལ་དུ་ཁེལ་ཡོད་སྟབས་འགྲུལ་བཞུད་ཀྱང་བདེ་པོ་ཡོད་པ་རེད། འགྲུལ་བཞུད་བདེ་མིན་ལ་མ་ལྟོས་པར་བོད་རིགས་བརྒྱ་ཆ་དགུ་ཅུ་ཙམ་འཛོམ་ངེས་ཡིན་ཅིང༌། གལ་ཏེ་ཉིན་ཤས་བཞུགས་པའི་དབང་དུ་བཏང་ན། ཁྱིམ་སྲུང་མཁན་དང་སྒོ་ཟོག་ལྟ་མཁན་རེས་མོས་ཀྱིས་བོད་ཀྱི་ཞིང་འབྲོག་གི་མི་གཅིག་ཀྱང་མ་ལྷག་པར་ཁོང་མཇལ་ཁ་ཡོང་རྒྱུ་ཕལ་ཆེར་ཐག་ཆོད་པ་རེད། དེ་ལྟ་བུའི་གནས་སྟངས་འོག་བདེ་འཇག་གི་ཐད་ནས་བཤད་ཀྱང་དཀའ་ངལ་འཕྲད་སྲིད་མོད། འོན་ཀྱང་རྒྱ་ནག་གཞུང་སྐྲག་སྣང་བྱེད་སའི་གནད་དོན་ནི་དེ་ལས་གཞན་པ་ཞིག་རེད།

གལ་སྲིད་༧གོང་ས་རྒྱལ་བ་རིན་པོ་ཆེ་དེར་ཕེབས་པ་ཡིན་ཚེ། མེ་མདས་བཀག་ཀྱང་མི་ཁོག་པར་བོད་མི་བརྒྱ་ཆ་དགུ་བཅུ་དེར་ཡོང་ངེས་ཡིན་ཅིང༌། ཡོང་བ་དེ་དག་ཀྱང་ལྟད་མོ་དང་མཚར་མཚར་ལྟར་མ་ཡིན་པར་ཞལ་མཇལ་གསུང་ཐོས་ཀྱི་བྱིན་རླབས་ཞུ་ཆེད་ཡིན་པ་དང༌། མི་དེ་དག་གིས་༧གོང་ས་མཆོག་ལ་ཁ་ཞེ་གཉིས་མེད་ཀྱི་དད་པ་གཡོ་བ་མེད་པ་དེ། ཁོང་ཚོའི་བྱ་སྤྱོད་ཀྱི་ཐོག་ནས་དངོས་སུ་མཐོང་ངེས་ཡིན་ལ། གནས་ཚུལ་དེ་འགེབས་ཐབས་མེད་པར་རྒྱལ་སྤྱིའི་ཐོག་ཕྱི་གསལ་ནང་གསལ་ཆགས་རྒྱུ་ཡིན་པ་རེད། རྒྱུ་མཚན་དེས་རྒྱ་ནག་གཞུང་གིས་རྒྱལ་སྤྱིའི་ཐོག་བོད་རིགས་མི་མང་རྣམས་ཏང་གི་སྲིད་ཇུས་ལ་བློ་ཁ་ཁེངས་ནས་ཡོད་པ་དང༌། ཏཱ་ལའི་རུ་ཚོགས་ལ་དགའ་པོ་མེད་པ། ཏཱ་ལའི་བླ་མས་བོད་མི་མང་གི་ཚབ་མཚོན་མི་ཐུབ་ལུགས་བཤད་པ་ཚང་མ་གཞི་འཛིན་ས་གང་ཡང་མེད་པར་ཆགས་གྱུར་ཡིན་ཅིང༌། རྒྱ་ནག་གཞུང་སྐྲག་ས་གཙོ་བོ་ནི་དོན་གནད་དེ་སྒང་ལ་ཡིན་པར་སྙམ།

དཔེ་གཞན་ཞིག་བཤད་ན། པཎ་ཆེན་རིན་པོ་ཆེ་སྦས་གསང་བྱེད་དགོས་པའི་རྒྱུ་མཚན་ཡང་དེ་ཡིན་ཏེ། གལ་ཏེ་༧གོང་ས་མཆོག་གིས་ངོས་འཛིན་མཛད་པའི་པཎ་ཆེན་དགེ་མདུན་ཆོས་ཀྱི་ཉི་མ་མཆོག་ཉིན་ཞིག་བོད་རིགས་ས་ཁུལ་ཞིག་ཏུ་ཕེབས་བཅུག་པ་ཡིན་ཚེ། བོད་མི་མང་གི་ངོས་ནས་དེར་མཇལ་ཁ་ཞུ་བ་སོགས་དགའ་བསུ་ཆེན་པོ་འཐོབ་རྒྱུ་ཡིན་པ་ནི། གཞུང་འབྲེལ་པཎ་ཆེན་རྒྱལ་མཚན་ནོར་བུ་ལ་དགའ་བསུ་ཞུ་དགོས་པའི་གཞུང་གིས་བཙན་བཀའ་བཏང་བ་དང་བསྡུར་ཐབས་རྩ་ནས་མེད་པར་ཆགས་ཀྱི་རེད། དེར་བརྟེན་ཚུལ་དེས་རྒྱ་ནག་གཞུང་ངོ་ཚ་ཁ་སྐྱེངས་ཆགས་པ་གཅིག་པུར་མ་ཡིན་པར། བོད་མི་མང་གི་མངོན་འདོད་གང་ཡིན་པ་དང་བོད་ཀྱི་ངོ་ཚབ་སུས་མཚོན་གྱི་ཡོད་མེད་དང༌། བོད་རྒྱ་བར་འབྲེལ་མོལ་འགྲོ་བཞིན་པ་འདི་ཡང་བོད་རྒྱ་ཆེའི་མི་མང་གི་བདེ་སྡུག་གི་ཆེད་ཡིན་དང་ཏཱ་ལའི་བླ་མ་དང་དེའི་འཁོར་གྱི་དཀའ་ངལ་ཞིག་ཡིན། དེ་ལ་སོགས་པ་མདོར་ན་བོད་ཀྱི་རྩ་དོན་དང༌འབྲེལ་བ་ཆགས་ཀྱི་ཡོད་པ་རེད།

འཕྲོས་རྗེས་སུ་གཟིགས།
Read more!

ས་ཡོམ་ཇི་ལྟར་བྱུང་བ་ཡིན་ནམ། དུམ་བུ་གསུམ་པ།

གཏེར་ཁ་སྔོག་པ་ལས་ས་ཡོམ་ཇི་ལྟར་ཡོང་གི་ཡོད་དམ། གོང་དུ་བཤད་པ་ལྟར་ས་འོག་གི་བྲག་རྡོ་ཆེན་པོ་དེ་ཚོ་འགུལ་སྐྱོད་ཐེབས་པ་ལས་ས་སྟེང་ན་ས་ཡོམ་བྱུང་བ་ཡིན་ཅིང༌། བྲག་རྡོ་ཆེན་པོ་དེ་ཚོ་འགུལ་སྐྱོད་ཐེབས་དགོས་པའི་རྒྱུ་མཚན་ནི། གོང་དུ་བཤད་པ་ལྟར་ས་འོག་གི་ཆུ་ཡིས་ས་བཤང་པ་དང༌བྲག་ཕུག་ཆེན་པོ་དེ་འདྲ་དིབ་པ་ལས་བྱུང་བ་ཡིན་ལ། གཏེར་ཁ་ཡུན་རིང་སྔོག་པ་དང༌། ལྷག་པར་བྲག་རྡོ་དེ་འདྲ་བཤག་བཏུབ་བྱེད་སྐབས་འཕྲུལ་ཆས་དང་མཉམ་དུ་ཆུ་མང་པོ་བེད་སྤྱོད་གཏོང་དགོས་ཤིང༌། ཆུ་དེ་དག་ས་འོག་ཏུ་རྒྱུགས་ནས་རྡོ་གཡམ་ཕན་ཚུན་བར་གྱི་ས་རྣམས་བཤང་པ་ལས་ས་འོག་གི་བྲག་རྡོ་ཆེན་པོ་དེ་ཚོ་ནུར་འགྲོས་བྱེད་འགྲོ་བ་ཡིན། དེས་ན་གསེར་གྱི་གཏེར་ཁ་སྔོག་པ་ལ་ཆུ་མང་པོ་བེད་སྤྱོད་གཏོང་དགོས་པས་ཉེན་ཁ་གཞན་ལས་ཆེ་བ་ཡོད་པ་རེད།

སྤྱིར་བཏང་ས་འོག་ལ་ཆུ་མང་པོ་སྔར་ནས་ཡོད་པ་མ་ཡིན་ནམ་ཞེ་ན་བདེན་མོད། དཔེར་ན། ས་སྟེང་དུ་ཡང་སྔར་ནས་འབབ་བཞིན་པའི་ཆུ་བོ་ཞིག་དང༌། གློ་བུར་དུ་རྡོལ་བའི་ཆུ་བོ་གཉིས་པོ་འཁྲུགས་ཐེབས་ཆེ་ཆུང་ཡོད་པ་ལྟར། སྔ་ནས་ཡོད་པའི་ས་འོག་གི་ཆུ་དེ་དག་གིས་རྐྱེན་རྩ་བྱས་ཏེ་གནའ་ནས་ད་ལྟའི་བར་ས་འགུལ་ཐེབས་པ་གྲངས་ཀྱི་མི་ཆོད་ཀྱང༌། ད་སྐབས་ཕལ་ཆེ་བ་རང་བཞིན་ལྟར་གྱུར་ཡོད་པས་ཉེན་ཁ་ཆུང་བ་ཡིན། འོན་ཀྱང་གཏེར་སྔོག་ནས་ཆུ་ཡི་རྒྱུག་ལམ་གསར་པ་ཞིག་བཟོས་པ་ཡིན་ན། དེ་ཡིས་རྐྱེན་བྱེད་དེ་ས་ཡོམ་ཡོང་བའི་ཉེན་ཁ་དེ་གཉུག་མའི་ཆུ་དེ་ཚོ་ལས་ཆེ་བ་ཡོད་པ་རེད།

ཆུ་ཆུང་ཆུང་ཡིན་ཀྱང་སྣང་ཆུང་གཏན་ནས་བྱེད་རྒྱུ་མེད་དེ། དཔེར་ན། ཁང་པའི་རྩིག་གསེབ་ཏུ་ཆར་གྱི་ཐིགས་པ་སོང་བ་ལས་རྩིག་པ་ལོག་ཅིང་ཁང་པ་ཡང་འགྱེལ་ཡོང་བ་བཞིན་ནོ། དེས་ན། ཆུ་ཐིགས་ཡུན་དུ་ཟག་པ་ལས༎ རྡོ་ལ་ཨི་ཁུང་འབིགས་ལ་ལྟོས༎ ཞེས་པ་ནི་རང་བཞིན་ནམ་དོན་དངོས་བརྗོད་པའི་གཏམ་ཡིན་ལ། ས་འོག་གི་བྲག་རྡོ་ནུར་འགྲོས་བྱེད་པ་ནི་ཚན་རིག་པས་ལྷོ་གླིང་བྱང་ལ་ནུར་བ་དང༌། གླིང་ཆེན་ཕན་ཚུན་གདོང་ཐུག་བརྒྱབ་པ་སོགས་བཤད་པ་ལྟར་རོ།

ད་དུང་དཔེ་གཞན་ཞིག་བཤད་ན། ས་སྟེང་གི་ཆུ་བོ་རྣམས་གང་ནས་རྒྱུག་པ་དེར་ཆེ་ཆུང་ལ་མ་ལྟོས་པའི་ལུང་གཤོང་རེ་དོད་ཡོད་ལ། ལུང་གཤོང་དེ་ཚོ་ལྷ་དང་མི་ཡིས་ཆུ་འདྲེན་པའི་ཡུར་བ་བཟོས་པ་ཞིག་མ་ཡིན་པར། ཆུ་མོ་རང་རང་གིས་ས་རྡོ་རི་བྲག་ལ་འཐབ་འཛིན་ཡུན་རིང་བྱས་ནས་གསར་བཏོད་བྱས་པ་ཞིག་ཡིན་པ་བཞིན། ས་འོག་གི་རྒྱུག་ཆུ་རྣམས་ལ་ཡང་དེ་མཚུངས་ཀྱི་ལུང་གཤོང་རེ་ཡོད་པ་དང༌། རྐྱེན་གང་ཞིག་དང་འཕྲད་པ་ན་ཟམ་པ་ལྟར་གནས་པའི་ཐོག་དེ་མར་དིབ་ཡོང་གི་ཡོད་པ་རེད།

དེ་དག་གི་མངོན་རྟགས་སུ་ཆུ་མེད་པའི་བྱང་ཐང་དང་བྱེ་ཐང་དེ་འདྲ་ལ་ཡང༌ས་གད་མཐོ་དམའ་སྣ་ཚོགས་ཡོད་པ་དང༌། དེ་མིན་མཚོ་དང་འཚེའུ། ཆུ་གྱེན་འཕྱུར་དང་ཀོང་དོང་སོགས་ངོ་མཚར་བའི་བཀོད་པ་འདྲ་མིན་ཡོང་གི་ཡོད་ཅིང༌། སྤྱིར་བཏང་བྱས་ན་ཇི་ཙམ་གྱི་རི་བོ་དང་སྒང་གཤོང་མང་བ་ཡོད་ས་དེར་ས་ཡོམ་ཡང་མང་བ་ཡོད་པའམ། མ་ཐ་ལ་དེ་སྔོན་ས་ཡོམ་མང་བ་བརྒྱབ་མྱོང་ཡོད་པ་དེ་གསལ་པོ་ཤེས་ཐུབ་ཀྱི་ཡོད་པ་རེད།

གཞན་ཡང་ས་འོག་གི་ཕུག་པ་དིབ་པའམ། རྡོལ་ལེབ་དེ་འདྲ་ཟུར་ཅིག་མར་ལྷུང་བ་དང་ཟུར་ཅིག་ཡར་འཕགས་པའམ། དེ་མིན་བྲག་རྡོ་ནུར་བ་སོགས་ལས་བྱུང་བའི་ས་ཡོམ་གང་ཞིག་ཡིན་ཀྱང༌། འགུལ་སྐྱོད་ཆེན་པོ་ཞིག་ཐེབས་པ་ན། དེའི་གཡས་གཡོན་ཀྱི་བྲག་རྡོ་མང་པོ་ཞིག་ལ་ཤུགས་རྐྱེན་ཐེབས་རྒྱུ་ཡིན་ལ། དེའི་མངོན་རྟགས་སུ། ས་ཡོམ་ཆེན་པོ་ཞིག་བརྒྱབ་པ་ན་དེའི་སྔོན་རྗེས་རྣམས་སུ་ས་ཡོམ་ཆུང་ཆུང་དེ་འདྲ་མང་པོ་ཡོང་གི་ཡོད་པ་རེད།

གང་ལྟར་ས་དོང་ནང་དང་རི་ཁོག་ཏུ་ཆུ་མང་པོ་བེད་སྤྱོད་གཏོང་དགོས་པའི་གཏེར་ཁ་སྔོག་པ་དང༌། གཞན་ཡང་སྣུམ་དང་སོལ་རླངས་ཀྱི་གཏེར་མང་པོ་ཞིག་བཏོན་པ་ཡིན་ན་ཡང༌། སྔར་གྱི་སོལ་རླངས་ཀྱི་གོལ་ས་དེ་སྟོང་པ་ཆགས་རྒྱུ་ཡིན་པས། དེའི་ཉེན་ཁ་སོགས་གོང་དུ་བཤད་པ་དང་རིགས་བགྲེ་ནས། ད་དུང་ས་འོག་ན་ཡོད་པའི་ཤིན་ཏུ་ཚ་བའི་དྲོད་ཚད་དེས་ཀྱང་ས་ཡོམ་གྱི་རྐྱེན་རྩ་བྱེད་པ་ཡོད་དེ་བཤད་པར་བྱའོ།

འཕྲོས་མུ་འགོད།
Read more!

ས་ཡོམ་ཇི་ལྟར་བྱུང་བ་ཡིན་ནམ།

གོ་ལ་ཆེན་པོ་འདི་ལ་ས་ཤུན་རིམ་པ་མང་པོ་བཙོང་གི་པགས་པ་ལྟར་ཡོད་པ་དང༌། རིམ་པ་ཁ་ཤས་ལྕགས་ལྟར་མཁྲེགས་པའི་རྡོ་ལེབ་ཡིན་ཅིང༌། རྡོ་ལེབ་དེ་དག་ལ་ཆེ་ཆུང་ཅི་རིགས་ཡོད་པ་ནས་ཆེ་བ་ཁ་ཤས་ནི་ཨེ་ཤ་ཡའི་གླིང་ཆེན་དང་མཚུངས་ཤིང་། རྡོ་གཡམ་དེ་དག་གི་མཐའ་སྣེ་ཁག་ནི་ས་ཡོམ་གྱི་ཉེན་ཁ་ཆེ་བའི་ཁུལ་ཡིན་པ་རེད། དེའི་སྐོར་པར་རིས་འདི་ལ་གཟིགས། གང་ན་དམར་ཐིག་མང་བ་ཡོད་པ་དེར་ས་ཡོམ་གྱི་ཉེན་ཁ་ཆེ་བ་ཡོད་པ་མཚོན་པ་ཡིན་ལ། ཐིག་རིས་ནག་པོ་ཕྲ་མོ་ཞིག་གིས་བཅད་ཡོད་པ་ནི་རྡོ་གཡམ་ཆེན་པོ་དེ་དག་ཇི་ལྟར་གནས་པ་དེ་མཚོན་པ་ཡིན།

ས་ཁྲ་དེ་ལ་བལྟས་པ་ཡིན་ན། བོད་ལྷོ་ཕྱོགས་ཧི་མ་ལའི་རྒྱུད་དེ་ས་ཡོམ་ཀྱི་ཉེན་ཁ་ཆེ་བའི་ཁུལ་ཡིན་པ་ལས། བོད་བྱང་རྒྱུད་རྣམས་ས་ཡོམ་གྱི་ཉེན་ཁའི་ཁོངས་སུ་ཚུད་མེད་ཀྱང༌། ལོ་ཤས་ནས་བཟུང་བོད་བྱང་རྒྱུད་དུ་ས་ཡོམ་མང་པོ་ཞིག་བྱུང་དང་འབྱུང་བཞིན་ཡོད། དེར་བརྟེན་ས་ཡོམ་དེ་དག་ཡོང་དགོས་པའི་རྒྱུ་མཚན་སྐོར་སླར་ཡང་བསམ་གཞིགས་བྱེད་དགོས་པ་བྱུང་ལ། དེ་ཡང་ལྷ་འདྲེ་གདོན་བགེགས་གྱི་གནོད་པ་སོགས་རྟོག་པ་འཆར་ཡན་གྱི་ལྟ་ཚུལ་མ་ཡིན་པར། དེང་གི་ཚན་རིག་དང་མཐུན་པའི་ལྟ་ཚུལ་ཁག་ཅིག་གཤམ་དུ་རོབ་ཙམ་བཤད་པ་བརྒྱུད། ས་གཤིས་ཐད་ཀྱི་མཁས་དབང་རྣམས་པས་བཀའ་སློབ་གནང་རོགས།

འཕྲོས་མུ་འགོད།

Read more!

བོད་མི་ཚོ་ཕྱི་རྒྱལ་ཁག་ལ་འགྲོ་དགོས་སམ།

གསལ་བཤད།

ཁ་སྔོན་ལོ་ཙཱ་བ་ཆུང་ཚེ་རིང་ལགས་ཀྱི་བཀའ་མོལ་ལས་འཕྲོས་ནས་གཤམ་གསལ་དོན་གནད་འདི་བྲིས་པ་ཡིན་མོད། དེང་སང་མི་ཚང་མའི་བསམ་བློ་ནི་བཀའ་ཁྲི་དང་སྤྱི་འཐུས་འོས་བསྡུ་ལ་ཕྱོགས་ཡོད་སྟབས། དེ་མིན་གྱི་གནས་ཚུལ་བཤད་ཀྱང་ཉན་མཁན་མི་ཡོང་བས་སྐབས་སུ་བབས་མེད་པར་སྙམ་ནས་ད་བར་ཕྱིར་འཐེན་བྱས་པ་ཡིན། འོན་ཀྱང་མདང་དགོང་ང་ཡི་གྲོགས་པོ་ཞིག་ནས། གནས་ཚུལ་འདིར་འོས་བསྡུ་དང་འབྲེལ་བ་ཆགས་ཡོད་པ་མ་ཟད། ལྷག་པར་བཀའ་ཁྲི་འོས་བསྡུ་དང་འབྲེལ་བ་ཆགས་ཡོད་པ་རེད་ཟེར། གཅིག་བྱས་ན་ཁོང་ནས་དེ་ནི་ཨ་རི་ནང་གི་སྲིད་འཛིན་འོས་བསྡུ་དང་གཅིག་མཚུངས་ངོས་འཛིན་བྱས་པ་ཡིན་ཤས་ཆེ།

ཨ་རིའི་སྲིད་འཛིན་འོས་མིར་ལངས་སྐབས་དོ་བདག་སོ་སོ་ནས། རང་ཉིད་སྲིད་འཛིན་ཆགས་ན་མི་མང་ལ་ཕན་པའི་ལས་ཀ་འདི་བྱེད་ཀྱི་ཡིན། ང་ལ་འཆར་གཞི་འདི་འདྲ་ཞིག་ཡོད། འཆར་གཞི་དེ་ལམ་ལྷོང་ཡོང་བའི་གདེང་ཚོད་འདི་ལྟར་ཡོད། རྒྱུ་མཚན་དེས་ཁྱོད་རང་ང་ལ་འོས་འཕེན་པར་ཤོག །ཅེས་ཁ་ན་ན་སྐད་རྒྱག་བཞིན་ཡོད། གང་ལྟར་མི་མང་གི་ངོས་ནས་ཀྱང་རྒྱུ་མཚན་དེ་དག་ལ་གཞིགས་ཏེ། རང་རང་ལ་ཁེ་ཕན་སྐྲུན་ཐུབ་པའི་འཆར་གཞི་དང་གདེང་ཚོད་ཡོད་ཅིང༌གང་དང་ལངས་ཕྱོགས་མཐུན་པ་དེ་ལ་འོས་འཕེན་བཞིན་ཡོད་པ་རེད།

དེས་ན་ང་ཚོའི་བཀའ་ཁྲི་འོས་མི་སུ་ཞིག་ནས། རང་ཉིད་བཀའ་ཁྲི་ཆགས་པ་ཡིན་ན། ༧ གོང་ས་མཆོག་དང་་་་་་བོད་རྒྱ་འབྲེལ་མོལ་་་་་་་རྒྱ་བལ་འབྲུག་གསུམ་ཁུལ་ཀྱི་བཙན་བྱོལ་བོད་མི་ཁྱིམ་དུད་རེ་ནས་མ་མཐར་མི་རེ་ཕྱི་རྒྱལ་ལ་སླེབས་ཐུབ་པ་བྱེད་ཀྱི་ཡིན། དེའི་ཐད་ཀྱི་འཆར་གཞི་འདི་འདྲ་ཞིག་ཡོད། ཐབས་ལམ་འདི་འདྲ་ཞིག་ཡོད། དེ་ལ་དགེ་མཚན་འདི་འདྲ་ཞིག་ཡོད་ཅེས་སོགས་བཤད་པ་ཡིན་ན། བཤད་པ་ལྟར་མ་ཡིན་པར་དངོས་གནས་ལག་བསྟར་བྱེད་རྒྱུའི་དམ་བཅའ་བརྟན་པོ་ཞིག་ཡོད་པ་ཡིན་ན། དེ་ལ་གཞིགས་པའི་མི་མང་ནས་འོས་ཤོག་མང་པོ་ཞིག་རག་རྒྱུ་ཡིན་པར་བསམས་ཡོད་པ་རེད། རྒྱུ་མཚན་དེས་འདི་ཟིན་བྲིས་སུ་མུ་འགོད་བྱེད་རྒྱུ་ཡིན།

གཅིག

བོད་ཀྱི་དབུ་ཁྲིད་༧གོང་ས་རྒྱལ་བ་རིན་པོ་ཆེ་མཆོག་ནས། ན་ནིང་ནིའུ་ཡོག་ཏུ་མི་མང་ལ་བཀའ་སློབ་གནང་བའི་སྐབས། བོད་མི་གང་འཚམས་ཞིག་ཨ་རི་དང་ཁེ་ཎ་ཌའི་ནང་ཡོང་ཐུབ་ཐབས་བྱེད་བཞིན་ཡོད་སྐོར་བཀའ་གནང་བ་དང༌། དེ་བཞིན་དཔལ་ལྡན་བཀའ་བློན་ཁྲི་པ་མཆོག་ནས་ཀྱང་། ན་ནིང་འདི་ག་ཝ་ཤིང་ཊོན་དང༌དེ་རྗེས་རྒྱ་གར་ཨོ་རི་ས་བཅས་སུ་མི་མང་ལ་བཀའ་སློབ་གནང་སྐབས། བོད་མི་རྣམས་ཨ་རི་སོགས་སུ་ཁྲིམས་འགལ་ཐོག་ནས་འགྲོ་མ་དགོས་པའི་ཐབས་ལམ་གཞན་ཡང་ཡོད་པ་དང༌། ཐབས་ལམ་དེ་བེད་སྤྱོད་གཏོང་བ་ཡིན་ན། དུས་ཡུན་གྱི་ཆ་ནས་ཟླ་བ་ཁ་ཤས་དང་ལོ་ཁ་ཤས་འགོར་སྲིད་པ་ལས། ཁྲིམས་དང་མི་འགལ་བ་དང་བུ་ལོན་མང་པོ་ལེན་མི་དགོས་པའི་དགེ་མཚན་ཡོད་སྐོར་བཀའ་གནང་ཡོད། འོན་ཀྱང་དེའི་སྐོར་བཀའ་འདྲི་ལམ་སྟོན་ཞུ་མཁན་སུ་ཡང་མ་བྱུང་བ་འདྲ།

གཉིས།

སྐད་ཅ་དུམ་བུ་དེ་སྔོན་དུ་བཏང་ནས་བོད་མི་རྣམས་ཕྱི་རྒྱལ་ལ་འགྲོ་བའི་ཐད་ནས་ཅུང་ཟད་གླེང་ན། སྤྱིར་བཏང་དེའི་སྐོར་བསམ་ཚུལ་མང་པོ་ཞིག་བྲིས་མྱོང་ཡང་ད་ཐེངས་ཡང་གཅིག་འབྲི་འདོད་བྱུང༌། གང་ཡིན་ཟེར་ན། ང་རང་གི་མཐོང་སྣང་དང་ཚོད་དཔག་ནོར་མེད་ན་གནད་དོན་འདི་ཕྱོགས་མང་པོ་ཞིག་ནས་བོད་ཀྱི་རྩ་དོན་དང་འབྲེལ་བ་དམ་པོ་ཡོད་པས་ཡིན།

ཚང་མས་ཤེས་གསལ་ལྟར། བཙན་བྱོལ་བོད་པ་རྣམས་ཨ་རི་དང་ཡོ་རོབ་སོགས་ཕྱི་རྒྱལ་ཡུ་གྲུ་ཁག་ཏུ་ཐར་ཐབས་བྱེད་བཞིན་པ་དེ་ལ་ལྟ་ཚུལ་མི་མཐུན་པ་གཉིས་ཡོད་ཅིང༌། གཅིག་ནི་བཙན་བྱོལ་བོད་མི་རྣམས་ཕྱི་རྒྱལ་ཁག་ལ་ཐར་ཐབས་བྱེད་པ་དེས་བོད་ཀྱི་རྩ་དོན་ལ་གནོད་ཀྱི་ཡོད་པར་ངོས་འཛིན་བྱེད་པ་དང༌། གཞན་གཅིག་གིས་བོད་པ་མང་ཙམ་ཕྱི་རྒྱལ་ཁག་ལ་གནས་སྡོད་བྱེད་ཐུབ་པ་ཡིན་ན་དེས་བོད་ཀྱི་རྩ་དོན་ལ་ཕན་པར་འདོད་ཀྱིན་ཡོད། གང་ལྟར་ཕྱི་རྒྱལ་ལ་སླེབས་པ་ཡིན་ན་རང་དང་རང་གི་ཉེ་འབྲེལ་ལྟོས་བཅས་ལ་དཔལ་འབྱོར་གྱི་ཁེ་ཕན་ཡོད་པ་དེ་ཕྱོགས་གཉིས་ཀས་ཁས་ལེན་པ་ཡིན།

དེ་ཡང་ཕྱོགས་དང་པོའི་བསམ་དོན་གཙོ་བོ་ནི་འདི་ཡིན་ནམ་སྙམ་སྟེ། བཙན་བྱོིལ་བོད་མི་མང་པོ་ཞིག་ཕྱི་རྒྱལ་ཁག་ཏུ་སོང་བ་ཡིན་ན། བོད་མི་དེ་རྣམས་གང་སར་ཁ་འཐོར་ནས་རང་གི་སྐད་ཡིག་དང་རིག་གཞུང་སྲུང་ཉར་བྱེད་མི་ཐུབ་པ་མ་ཟད། ཐ་ན་རང་གི་བུ་རབས་ཚ་རྒྱུད་ཚོས་བོད་སྐད་ཀྱང་རྒྱག་མི་ཐུར་པར་གྱུར་ཏེ། མཐར་མི་རིགས་ཀྱི་ངོ་བོ་ཚུན་ཆད་རྩ་བརླག་ཏུ་འགྲོ་རྒྱུ་ཡིན་པ་དང༌། ད་དུང་། བཙན་བྱོལ་བོད་མི་མང་པོ་ཞིག་ཕྱི་རྒྱལ་ཁག་ལ་གནས་སྤོས་བྱས་པ་ཡིན་ན། རྒྱ་གར་ནང་གི་བོད་བཙན་བྱོལ་གཞུང་གི་སྒྲིག་འཛུགས་དེ་ཡང་ཉམས་ཆག་ཏུ་འགྲོ་བ་དང༌། དེ་ཉམས་ཆག་སོང་བ་ཡིན་ན་ཁང་པ་ཞིག་གི་དཀྱིལ་ཀ་འགྱེལ་བ་དང་དམག་དཔུང་ཞིག་གི་སྤྱི་ཁྱབ་བཀོད་འདོམས་ཁང་མེད་པར་གྱུར་པ་དང་འདྲ་བ་བོད་ཀྱི་རྩ་དོན་ལ་གནོད་སྐྱོན་དེ་ཡན་མེད་པ་ཞིག་ཐེབས་རྒྱུ་ཡིན་པར་བསམ་བཞིན་ཡོད།

དེ་མིན་གསང་སྤྱོད་དང་ཕོར་པ་འཁྲུ་བ་ཟེར་བ་དང༌། འབྱོར་ལྡན་ཚོའི་བྲན་གཡོག་རྒྱུག་དགོས་པས་སྐྱིད་པོ་མེད་ཟེར་བ་སོགས་ནི་གནས་ལུགས་མ་ཤེས་པའི་བྱབ་ཆུང་གི་སྐད་ཅ་ཡིན་པས་ཕྱི་རྒྱལ་དུ་འགྲོ་རྒྱུ་མེད་པའི་རྒྱུ་མཚན་དུ་མི་འགྲོ་ཡང༌། སྐད་ཅ་བྱབ་ཆུང་དེ་ལ་ལན་བྱབ་ཆུང་ཞིག་ཞུས་ན། སྤྱིར་ཡོངས་ནས་ཕྱི་རྒྱལ་ལ་བོད་པ་མང་པོས་ཕོར་པ་འཁྲུ་བ་དང་ཁ་ཤས་ནས་སྐྱག་ཁང་ཁྲུས་ཡོད་སྲིད་ཀྱང༌། མང་པོ་ཞིག་ནས་ཆེས་ཡོང་སྒོ་ཆེ་བའི་ཁྲིམས་རྩོད་པ་དང་སྨན་པའི་ཕྱག་ལས་གནང་བཞིན་ཡོད་ལ། ད་དུང་རྒྱལ་སྤྱིའི་དངུལ་ཁང་དང༌། འཛམ་གླིང་ན་སྐད་གྲགས་ཡོད་པའི་གཙུག་ལག་སློབ་གྲྭ་དེ་འདྲའི་ནང་དགེ་རྒན་ཆེན་མོ་བ་གནང་བཞིན་ཡོད། དེ་མིན་རང་རང་གི་ཚོང་ལས་གཉེར་བ་དང༌། བོད་ཕྱི་ནང་གཉིས་ལ་ཕན་ཐོགས་པའི་ཐེབས་རྩ་དང་རོགས་ཚོགས་གཉེར་མཁན་ཡང་མང་པོ་ཡོད།

ལར་ནས་འགྲོ་བ་མི་ཡི་སྡུག་བསྔལ་ཆེ་ཤོས་ནི་སྐྱེ་རྒ་ན་འཆི་གསུམ་ཡིན་པར་ཡོང་གྲགས་ལ་དེ་གསུམ་ནི་ཕོ་མོ་དང་ཤར་ནུབ་དང་སྤྱི་ཚོགས་སོགས་ཀྱི་ཁྱད་པར་མི་དབྱེ་བ་ཡིན། དེ་གསུམ་གྱི་རྗེས་སུ་སྡུག་བསྔལ་ཆེ་ཤོས་ནི། དམིགས་བསལ་ཁྲིམས་གཅོད་འདྲ་མིན་དང་བཙོན་དུ་བཅུག་པའི་སྡུག་བསྔལ་སོགས་དང་། སྤྱིར་བཏང་གི་ཆ་ནས་བཤད་ན་ཟ་གྱོན་སོགས་རང་རང་གི་འཚོ་ཐབས་ཀྱི་དཀའ་ངལ་ལས་བྱུང་བའི་སྡུག་བསྔལ་དེ་དག་ཡིན་ལ། གང་ལ་སྡུག་བསྔལ་དེ་དག་ཡོད་པ་དེ་ལ་བདེ་སྐྱིད་མེད་པ་སྟེ། སྡུག་བསྔལ་ཡོད་པ་དང་བདེ་སྐྱིད་མེད་པ་གཉིས་བཤད་སྟངས་མ་འདྲ་བ་ལས་དོན་གཅིག་ཡིན་པ་རེད།

དེས་ན་ཕྱི་རྒྱལ་ཁག་ལ་འཚོ་ཐབས་ཀྱི་ཆ་ནས་ཐོག་མར་ཟ་གྱོན་གྱི་དཀའ་ངལ་ལས་བྱུང་བའི་སྡུག་བསྔལ་མེད་ཅིང༌། དེ་ནི་འགྲོ་བ་མི་ཡི་གཞི་རིམ་གྱི་དཀའ་ངལ་ཆེ་ཤོས་ཤིག་ལས་གྲོལ་བ་རེད། དེ་ནས་ཆུ་ཆད་པའི་སྡུག་བསྔལ་དང་། གློག་ཤི་བའི་སྡུག་བསྔལ་སོགས། མདོར་ན་དབྱར་ཚ་བ་དང་དགུན་གྲང་བའི་སྡུག་བསྔལ་གང་ཡང་མེད། མ་གཞི་ནས་བཀྲེས་ལྟོགས་དང་ཚ་གྲང་གི་སྡུག་བསྔལ་ནི་དམྱ་བ་དང་ཡི་དྭགས་སོགས་ངན་སོང་གི་སྡུག་བསྔལ་ཉིད་དུ་བཤད་པས། སྡུག་བསྔལ་དེ་དག་ལས་མ་གྲོལ་ན་བདེ་འགྲོ་མི་ལུས་ཐོབ་ཀྱང་ཇི་འདྲའི་ཐབས་སྐྱོ་པོ་ཞིག་མ་རེད་དམ། དེ་བཞིན་ཡུལ་མིས་བརྙས་བཅོས་བྱེད་པའི་སྡུག་བསྔལ་དང་། རྒྱ་ལག་ཏུ་ཕྱིར་འབུད་བྱེད་པའི་སེམས་ཁྲལ་དང་སྡུག་བསྔལ་ཀྱང་མེད་པ་ཡིན།

གལ་སྲིད་མགྲོན་ཁང་ཆེ་བ་ཞིག་གི་གསང་སྤྱོད་འཁྲུ་མཁན་ཡིན་པར་ཆ་བཞག་ན། ཟླ་རེར་ཉུང་མཐར་ཨ་སྒོར་བཞི་སྟོང་ཡན་ཆད་ཡིན་པས་དེ་ནི་རྒྱ་གར་སྒོར་མོ་འབུམ་གཉིས་ཡས་མས་རེད། གལ་སྲིད་མི་གཞན་ཞིག་གིས་ལས་ཀ་དེ་འཕྲོག་རྩིས་བྱས་པ་ཡིན་ན་ཁོ་པས་འཛིང་རྩོད་དང་གཏུག་བཤེར་བྱེད་ངེས་ཡིན་ལ། དེས་ག་རེ་མཚོན་པ་རེད་ཅེ་ན། གསང་སྤྱོད་འཁྲུ་བ་དེས་ཁོ་ལ་སྡུག་བསྔལ་སྤྲོད་ཀྱི་མེད་པར་དེ་ལས་ལྡོག་སྟེ་སྤྲོ་བ་བྱིན་གྱི་ཡོད་པ་དེ་གསལ་བཤད་བྱེད་པ་རེད། མདོར་ན། བདེ་སྡུག་གཉིས་ནི་ནང་སེམས་ཀྱི་ཁྱེར་སོ་ལས་ཕྱི་དངོས་པོ་ཁོ་ན་ལས་བྱུང་བ་མ་ཡིན་པས། གསང་སྤྱོད་ཁྲུས་ན་སྐྱིད་པོ་མེད་པ་དང་། གསེར་དངུལ་ཁྲུས་ན་སྐྱིད་པོ་ཡོད་པ་དེ་འདྲ་གཏན་ནས་མིན།

འཕྲོས་རྗེས་མ་གཟིགས།

Read more!